وزارة الصحة الاتحادية…. قرون استشعار الصحة_ضغطة زر Surveillance Dashboard

قرون استشعار الصحة_ضغطة زر
Surveillance Dashboard
بتكون عارف قرون استشعار النمل البعرف بيها الخطر من بعد اميال و بتكون سمعت بزرقاء اليمامة البتشوف بيها الشعرة البيضاء في اللبن وتشوف الراكب من مسيرة ثلاثة ايام …. كل ده بتكون عارفو و سمعان بيه . لاكني ماااا اظن سمعت بي عطش اليموت غرقان … عذرا (اقصد ما ظن سمعت بي مرصد الوزارة الا الآن) …..الليلة تسمع و تشوف
💫💫
دحين لو داير تعرف وضع الكوليرا و عدد الحالات يوميا و الوفيات و مكانها ووضع كل ولاية و محلية و شكل الوباء زايد واللا ناقص …بس عليك بضغطة زر واحدة (بس click) علي رابط الداشبورد dashboard بتاع الوزارة
https://app.powerbi.com/view?r=eyJrIjoiZDdhYjczYmItMmU1My00OGRiLWIxMTUtM2VjZjg4YjE5ZmNlIiwidCI6ImIzZTVkYjVlLTI5NDQtNDgzNy05OWY1LTc0ODhhY2U1NDMxOSIsImMiOjh9
ولو داير تعرف كذلك عن الملاريا….عن الضنك ….عن الحصبة ….بس عليك بذات الزر.
💫💫
ياخي ده شغل مميز جدا.
اول حاجة معناها ناس الصحة كاشفين الوضع و عارفين الحاصل في كل المحليات …ايوة كل المحليات دون استثناء…
💫💫
انت بس قول داير معلومات ياتو محلية و انقر عليها…داير ضربات الشمس في القنب والاوليب .. واللا داير الحصبة في سرف عمرة… واللا داير الكوليرا في باو…واللا داير الضنك في البرقيق…واللا داير الكلف و النمش و حب الشباب في شنب البعوضة…… ده كللللو تلقاه بس بي ضغطة زر و تتجول في زحمة بانوراما المعلومات في مرصد الاوبئة الصحية للوزارة الاتحادية و انت تتكيء علي اريكتك الوثيرة في قصر الشانزلزيه او تحت راكوبة بت أمونة في الجول ريفي الباوقة (ما فارقة ما تعاين لي…. ياها الاتكاءة و حقت جولنا اريح وباوقتنا مافي قداما غير مكة والمدينة)
💫💫
تانيا الداشبورد ده فيه قدر كبير من الشفافية و تمليك المعلومات للمجتمع و الاعلام و الشركاء و ناس الصحة وكل الشرائح من البروف لحدي ال ما بيفهم الا بالنظر.
💫💫
ثالثا وسيلة مهمة جدا للاستجابة السريعة و التنسيق المحكم مع الشركاء مما اسهم في احتواء الاوبئة في ازمنة قياسية…
فالقاعدة الاساسية عندنا (بلسان محمد صبحي) نرصد المرض بدري نتدخل بدري نحتوي الوباء بدري…نترقي !! (الله لا جاب الرفد)…ما عندناش نصي_نص.
💫💫
ياخي اولادنا لمن قدموا الشغل ده مع دول الاتحاد الافريقي بحضور 40 دولة او اكثر كرموهم عدييييل كده و قالوا ليهم ما ممكن تكونوا عملتوا الشغل ده في زمن الحرب و كمان تم اختيار السودان ممثلا لدول الاقليم ….شكرا احمد عزالدين شكرا علي ابوالقاسم …. ياخي الاثنين ديل يتعلو ما يتدلو…
شباب قنع لا خير فيهم
و بورك في الشباب الطامحينا
💫💫
حاليا و كل أسبوع تنسق ادارة الطواريء اجتماع اسبوعي و بحضور شركاء العمل الصحي والإنساني و يتم عرض التقرير الوبائي الاسبوعي عبر هذا البرنامج التفاعلي فيتم اتخاذ القرارات المبنية علي المعلومات …فشكرا ادارة الطواريء ..منتصر.. الفاضل .. ليلي …و شباب و شابات غرفة عمليات الطواريء ….البتعملوا فيه نسجلوا في سفر (بكسر السين و سكون الفاء لناس شهادة لندن) معجزات الصحة زمن الحرب… نفخر و نفاخر بكم و حق لنا الافتخار بجيشنا الابيض….
💫💫
دي دعوة ليكم متابعي شأن الصحة من السادة الاعلاميين و الاعلاميات و كذلك للكوادر الصحية و كذلك للشركاء….البرنامج متاح و الرابط متاح و ما عليك إلا ضغطة زر.
انا دايما بقول الصحة بحر من الانجازات لا ساحل له ونحن (اكواب) علي ساحله نغرف و نكتب و نغرف و نكتب و نغرف و نكتب و مازال الليل طفل يحبو…..
و نعاود مع انجاز اخر للجيش الابيض بإذن الله
💫💫💫💫💫💫
د.هيثم محمد إبراهيم
وكيل وزارة الصحة الاتحادية






