عام

كلية الموسيقى والدراما… بيتنا البِلمّنا سنين وجمعنا على المحبة والفن ريان عبدالمجيد تكتب :شموخ كلية الفنون

كلية الموسيقى والدراما… بيتنا البِلمّنا سنين وجمعنا على المحبة والفن

ريان عبدالمجيد تكتب :شموخ كلية الفنون

التحية لكل أساتذتنا الكبار في قسم الموسيقى والدراما، والتحية موصولة لكل الطلاب والطالبات والخريجين الذين كانوا يومًا جزءًا من هذا الحوش الكبير.

دي ما كلية وبس… دي بيتنا الكبير، الحضن الدافئ البقينا فيه أجمل سنين العمر، بضحكتها ودمعتها، بحلاها ومرّها. هنا عرفنا يعني شنو فن، وتعلمنا إنو الإبداع ما بس موهبة… الإبداع روح ورسالة وواجب تجاه الوطن.

كلية الموسيقى والدراما بجامعة السودان للعلوم والتكنولوجيا، هي المصنع الطلع أسماء كبيرة رفعت اسم السودان في السماء، في الغُنا وفي المسرح. من هنا اتخرجت أصوات غنت للوطن، وممثلين ومبدعين خلدوا أسمائهم في تاريخ الفن السوداني.

وأنا، ريان عبدالمجيد، كنت يومًا جزءًا من هذا الصرح العظيم، مشيت في ممراته، وجلست في قاعاته، وشاركت في لحظاته الحلوة والمرة. شهادتي فيها ما مجاملة… دي فعلاً مدرسة للحياة قبل ما تكون بس كلية.

ومهما مرت علينا ظروف البلد، الكلية دي ح ترجع… وأقسم بالله ح ترجع، لكن ما زي الأول، بل أحلى وأجمل وأكبر من الأول. ح ترجع مسارحها عامرة بالتصفيق، وقاعاتها مليانة عزف وضحك ونقاش، وجدرانها تلمع بألوان الحياة.

نحن أبناء الكلية، وين ما كنا، في قلبنا عهد إنو ح نكون معاها، ندعمها ونوقف معاها، لحدي ما نشوفها واقفة شامخة من جديد. لأنو الفن ما بموت، والموسيقى ما بتنطفئ، والمسرح عمره ما بيخلي النور يطفي.

يا كلية الإبداع… ح ترجعي لعرشك، وتكوني دايمًا منارة للفن في السودان، وتكتبي فصل جديد أجمل من كل الفصول.

ومن هنا، أناشد السادة المسؤولين في وزارة الثقافة والإعلام بوقفة صادقة وعمل جاد من أجل تعمير وإحياء كلية الموسيقى والدراما، لأنها ليست مجرد مبنى… بل قلب نابض بالسلام والجمال.

ريان عبدالمجيد(ريان بيانو)

بالفن يأتي السلام 🎬🎼

مقالات ذات صلة

زر الذهاب إلى الأعلى