مواطنون: “وداعاً لمعاناة السفر.. كسلا تستعد لتصبح مدينة طيبة” استطلاع استباقي كسلا: انتصار تقلاوي

مواطنون: “وداعاً لمعاناة السفر.. كسلا تستعد لتصبح مدينة طيبة”
استطلاع استباقي
كسلا: انتصار تقلاوي
أيام قليلة وتصبح كسلا على موعد مع حدث طبي تاريخي. اكتملت كافة الترتيبات لافتتاح مركز القسطرة وجراحة القلب، في خطوة وصفتها الأسر بأنها “طوق نجاة” سينهي معاناة السفر والذل بحثاً عن العلاج.
ومع اقتراب ساعة الافتتاح، تحولت الولاية إلى خلية نحل.. أجهزة وصلت، أطباء تدربوا، ومواطنون يعدون الدقائق ليرفعوا شعار: *”كسلا مدينة طيبة”*.
كنا بنشيل موتانا في الطريق
الحاجة آمنة عبد الله من ريفي نهر عطبرة، عيناها تلمع بالأمل:
“سمعت الخبر وما صدقت. ولدي الله يرحمه مات في بص شندي وهو ماشي الخرطوم عشان قسطرة. الليلة لما قالو المركز جاهز بكيت من الفرح. أخيراً أرواحنا بقت غالية عندنا. كسلا حتبقى مدينة طيبة بالجد”.
“نوفر قروش وزمن ودموع”
المواطن محمد صالح، سائق هايس خط كسلا – الخرطوم:
“أنا بودي 4 حالات في الشهر للخرطوم. الواحدة بتكلف 2 مليار ترحيل + سكن + علاج. ناس كتار برجعو في نص الطريق. المركز دا لو اشتغل حيوفر على المواطن المليارات. وربنا يجعلو في ميزان الوالي والحكومة”.
حلمنا اتحقق قبل ما نشوفو
الشابة سارة تاج، طالبة طب:
“نحن كطلاب طب في كسلا دا أكبر حافز. كنا بنقرا عن القسطرة في الكتب ونسافر نشوفها. هسي حنتدرب في بلدنا. دا معنى كلمة مدينة طيبة.. مدينة بتبني كوادرها وبتعالج ناسها”.
رسالة لكل السودان
الأستاذ عوض الكريم، من حي الشهيد تاج السر:
“في عز الظروف دي كسلا تقول للعالم: نحن بنبني. مركز قسطرة في الشرق يعني استقرار. يعني زول المريض ما حيفكر يهاجر عشان يتعالج. دا إنجاز ما بيتقدر بمال”.
مصدر من وزارة الصحة:
أكد مصدر بالوزارة أن “كافة الأجهزة وصلت وتم تركيبها، والكوادر الطبية أنهت التدريب، والافتتاح سيكون خلال الأيام القادمة بحضور رسمي وشعبي كبير”.





