عام

مسارميديا تشاطر الخبير الاقتصادي والوطني الغيور دكتور لوي عبدالمنعم في وفاةخالة  قصيدة في رثاء خالي (شقيق الوالدة) الطبيب الانسان الدكتور أمير نواف احمد عباس رحمه الله و جعل قبره روضة من رياض الجنة*

*مسارميديا تشاطر الخبير الاقتصادي والوطني الغيور دكتور لوي عبدالمنعم في وفاةخالة
قصيدة في رثاء خالي (شقيق الوالدة) الطبيب الانسان الدكتور أمير نواف احمد عباس رحمه الله و جعل قبره روضة من رياض الجنة*
____
دكتور أمير طبيب من أبناء وادي حلفا عمل لفترة بمستشفى مروي وكانت لديه سمعة ممتازة في أوساط أهل المنطقة عامة والمرضى ، خاصة في مجال تخصصه كطبيب نساء وولادة. وعندما تقرر نقله من مروى الي القضارف أبدعت شاعرتنا الشول عبد الله التي تعمل داية، هذه القصيدة تمدحه فيها وتتحسر على فراقه وتذكر محاسنه

يا سلام يا دكتور أمير
يا سلام يا دكتور أمير

شكرو مو دايرلو تفسير
للبنات جرتق من حرير
يا دكاترتنا الدنانير
ربي يجزيكم كل خير

جايي بي دبلوم للنساء
لي شبابنا حبيب القسا
خت تاريخا ما اتنسى
إنت روحا للآنسة

الشعوب مدحوك بالزين
من زمان يا شاب كنت وين
جيت رحمة للمساكين
بي وجودك مطمنين
الكريم ينجاك من العين
يا نجدة الأم والجنين

عاش أمير الوالدو نواف
بي وجودو قلبنا آب يخاف
لي شماليتنا الله شاف

فوق أمير انضم ما كضب
للبنات جرتق من دهب
يا حبيب إن عندك تعب
بالضعيف والفقري رحب
أماني جاك دكتور يا صنب

عاش أمير ود عزا مكان
التقيل ميزانو ماهان
ود سلاطين وإنت سلطان
كشفو لي داياتو مجان

فوق أمير أنا بقلب وأجيب
للبنات عند الضيق حبيب
إن شاء غيب في النوم ما تغيب
المريضة تشوفك تطيب
من شكرو عاجزي أب شكراً عجيب
جيت نجدةً لأمات سبيب

يا أمير المتلك منو
ما أظن دكتور مثَلو
ماب نفارقو ان دار ينقلو
الطبيب أب لهجا حلو

الطبيب القولو مسموع
المرض بتعالجو أي نوع
يبرا جرحك قبل السبوع
بي وجودك راسنا مرفوع

في قريرنا يتم الأوان
نطرا مروي الفيها رحمن
يا سواق اجريلنا عجلان
نصل أمير الماهو خجلان
من نشوفو نخش الأمان

يا مجاهد ماك مقصر
انت حاشاك ماب تقصر
انت مما جيت متنصر
عالج الكان ماشيات مصر
كت بزيد بس خفلو السحر

الطبيب البيك نعتمد
عالج العاقر الماب تلد
كلها القاسي الفيك تسد
ليها يا جيد مستعد

الطبيب شال الكاس وفاز
انت جيد وانت ممتاز
الدهب ترقش في القزاز
عاش أمير ود ناسا عزاز

يا القضارف شال فيكي نور
الله شافك وجاكي دكتور
بي عروسو التشبه الحور
عيني باردي جمال السرور
لا تخلونا تعال مرور

القضارف جاتا خيرات
الله شافكن يا الطالبات
طالبات العالي بالذات
عروس امير اخلاقا طيبات
بي وجودا بناتنا ناجحات
يجمعنا بيكم جامع الشتات

يا كريم فراج الهموم
داير يخلينا امير يقوم
يا طبيب وضح لنا اللوم
خلا نوم الشعب مقسوم

عافا زهرة الكان دار تموت
كت شفقت وجاني الهبوط
ليهو بشعر بي أعلى صوت
انت بي ارواحنا مربوط

ان شاء امير مننا ما يقوم
تلغى نقليتو الخاتي لوم
فوقو اماني شبعنا في النوم
بي غيابو نساهر النجوم

الفزع يا مروي واب دوم
افزعونا امير دار يقوم
حار فراقو ان قام فرد يوم
بحرنا نشرب منو ونعوم

اجرو يا ناس تنقاسي جاي
الفزع بفزعكم معاي
ان قام امير بيبهدل الراي
حلاة امير تفرق على الشاي
الله يحفظك آ ود حشاي
يجرو ناس اب رنات شديد
قبل امير ما يبعد بعيد
الطبيب الكمل الريد
زهرة جاب لها عمرا جديد

الفزع يا ناس الكري
قولة امير قايم جابو لي
راسي موجع وكاويني كي
شدو حيلكم ونبهو الحي

الفزع يا ناس القرير
نكبة معلومة ان قام امير
الطبيب الشايل الدمير
ان لحقتوهو قريب اخير

الكنيسي واوسلي الفزع
جاكن الملحوظ في السمع
رينا المشروعو بدع
جداولو كابي خلوقو تقرع
كلما نقلوهو نطمع
نحن لا قين فيهو النفع

أجرو يا ناس كورتي انتو وين
نحن بيكم دار نستعين
الطبيب الخلقو الله زين
دار يخلينا يقوم دحين

الفزع يا ناس المقل
افزعونا امير اتنقل
الطبيب البيهو التكل
بعد يقوم زي بعضو الزعل
يا شمالنا الدخلك خلل

يا حزيمة ويا الزومة عوك
اجرو يا سادة ويا ملوك
يا طبيبنا الدار ينقلوك
الموفق وكفو مبروك

الطبيب الحجو مبرور
كفو مبروك زار الرسول
الموفق ما لامو زول

من كريمة يجوك للعلاج
انت للفتراني دراج
الشمال لي يدو محتاج
الله لا يوم سفرو فراج

من كحيلة والمناصير
البنات جنك بي دليل
اتعالجن قامن مسارير
جنة النسا يا وشي الخير

انتو يا ناس نوري صلاح
الحقونا فجر في الصباح
يا طبيبنا الطيارو أباح
ساق عروستو ملكة السماح
الكرم لي بابو مفتاح
جامعية وفايقة نجاح

الفزع يا ناس الدويم
أبو سيد أحمد صالحا عظيم
قام طبيبنا المعروف كريم

دوبة لأب سفرا بالنهار
في الشمال ختالو تذكار
عالج الشابات والكبار
علي الجماهير طعامو دار

مقالات ذات صلة

زر الذهاب إلى الأعلى